سامحى مصطفي يكتب من محبسه : مستشفي الليمان .. الموت ينتظرك
حينما تدخل مستشفى الليمان وترى النظافه والجو الجميل والشبابيك اللى بتطل على الخضره الجميله اللي اتحرمنا منها 3 سنوات والحمامات النظيفة غير بقي السراير اللي الواحد قرب ينساها فعلا حاجه تبهرك وتقول فيها ايه لما تكون السجون كدا .. بس مع الانبهار وهذه الاشياء الجميله وان هذا امر طبيعي لاستقبال المرضى وعلاجهم …
الا انك لا تتخيل او تتصور ان الموت ينتظرك على احدي هذه الاسره او انك ستفقد بصرك او ستصاب بأمراض اخرى غير التي تعاني منها ،، دخلت مستشفي الليمان لكي يتم ترحيلي الى مستشفي المنيل الجامعي لاستكمال العلاج ولكن قابلني احد اصدقائى قال لي انت قدامك شهرين تلاته علشان يتعملك ترحيله وممكن ترجع سجنك من غير اصلا ما تتعالج … قولتله ياعم مش للدرجه دي طيب بص اللى في السرير الاول دا عنده تشوه فى القرنيه وليه 6 شهور هنا ومحصلش معاه حاجه خالص .. شوف اللي جمبه دا محتاجه عمليه قلب مفتوح ومنتظر ترحيله للمنيل علشان يعمل اشعه بقاله 6 شهور …
شوف الراجل دا عنده سرطان ومنتظر ترحيله معهد ناصر ومحصلش معاه حاجه .. ودا فقد عينه بسبب الاهمال ودا المفروض يعمل قسطره على القلب وليه اكتر من سنه .. بص السرير دا بقي كان واحد دخل المستشفى هنا وعنده سرطان قطره 3 سم في المثانه نتيجه الاهمال الطبي تمكن السرطان من ثلثي المثانه ومات هنا .. قولتله يا عم انا موضوعي سهل والترحيله هتيجى علطول .. قالي انسى وهنشوف .. صديقك الصحفي محمد العادلي موجود هنا المفروض يعمل اشعه رنين ومحصلش معاه حاجه… دا انا كنت عايز اقولك الحالات اللى فى ملحق المستشفى المرضى كلهم في مكان واحد الامراض على مختلف الانواع درن وفيرس c وعظام وامراض اخرى …الخ
بالفعل انا لى اكتر من شهر ونص متعملش ليا ترحيله حتي الان الوضع هنا صعب بالفعل واداره المستشفي تتعامل مع المرضى انهم جايين يقضوا فتره راحه وبعدين يترحلوا للسجون بتاعتهم مره اخرى في ناس اصيب بأمراض بسبب عدم تعرضهم للشمس وعدم المتابعه الطبيه والاهمال الطبي ،، محتاجين لجنه طبيه ولجنه حقوق الانسان تيجي تشوف الحالات دي قبل ما تدهور حالتهم ويفارقوا الحياه وتسمعوا اخبار ان ناس ماتت فى المستشفى … سامحي مصطفي (صحفي )
